ممنون په پېښور او کابل کې د بي بي سي روزنيزې خپرونې راديو يرامونه هم


گران و هڅاند تڼی صاحب ته د سبا لپاره


استاد ممنون مقصودي په يوه هنرمنده- فرهنگياله کورنۍ کې  سترگې پرانېستې، خاپوړې يې کړې، را غوټکی شوی او ځوانۍ ته رسېدلی...
له هماغې وړکينې يې د مشرې خور (ارواښادې صايمه مقصودي)  او مشر ورور (داود مقصودي) پر پلونو يې  د راديو او بيا تلويزيون لاره پسې اخېستې،د ننداريزو  داستانونو، راديو ډرامونو  او تلويزوني سريالونو  په  لوبولو کې د يوه بريالي  لوبغاړي  په توگه راځلېدلې  او په تنکۍ ځوانۍ کې  د اووم هنر ياني (فېلم ) نړۍ ته له گام اېښوولو سره د ننداريز هنر پر آسمان لکه کاروان ستوری راپړکېدلی دی. 
د  لومړي پښتو فېلم ((د کونډې زوی)) د اتل په توگه چې  سېنارو يې نوميالي طنزليکوال واحد نظري او ارواښاد  منان ملگري  په گډه کښلې وه، دومره څرگند او او څار شو چې له هغه راهيسې، په څه له پاسه څلوېښتو کلونو کې کوم بل فېلم لره او بره خوا را و نه شو ننگولای؛ تر دې چې د (کونډې زوی) او فېلمي نوم (شاد گل) او ان ورسره لوبېدلې وزه د(بزِ شادگل) په نامه پر يوه پارسي  گړنه (محاوره) اوښتې چې د  ډېرو کابل اوسېدونکيو د ژبې پر سر غځونې کوي!
او دادی نن د کابل پوهنتون د هنرونو پوهنځي د فېلم و تياتر څانگې استاد ممنون مقصودي  بي بي سي پښتوخپرونې د يوه بېساري (دېکلاماتور) په توگه  را مېلمه کړی او  زه  بيا  د هنري- ادبي برنامې پاږوال  او پياوړي وياند سپين تڼي منندوی يم چې ماته يې هم  له دغه هنري دوست سره د ملگرتيا  بلنه را کړې   گوندې يې له طلايي حنجرې نه خپل شعر نيم   واورم او د استاد حمزه شينواري غوندې مې ځانته د شعرو شاعرۍ تمه پيداشي، چې ويلي يې ول: 
چې  مې خپل شعر له چا نه واورم حمزه 
                        وايم دا هسې وينا چا کړې ده!